Berriz ere Barañain abesbatzarekin elkartzeko aukera

Orain dela gutxi arte, jendaurrean kantatzeko aukerarik ez dugu izan; orain, berriz, bai, badago,  baina 2020-2021eko ikasturtea bukatzen ari zaigunez gero, pentsatu dugu badela garaia entzuleekin elkartzeko eta ikasturteari amaiera behar bezala  emateko.

Horregatik, datorren ekainaren 29an, arratsaldeko 8etan, Barañaingo  kulturgunean, zuekin elkartzeko parada izanen dugu, Barañain abesbatzak  eskainiko duen emanaldian, eta aldez aurretik eskerrak eman nahi dizkizuegu etorriko zareten guztioi.

Aurtengoa urte berezia izan da, eta nork bere baitara  biltzeko abagunea izan du. Abesbatzako  kide bakoitzak bizi izan duen egoera begirunez hartu dugu, eta baita  parean egokitu zaigun jende ororena ere. Ulertu dugu norberaren esku dagoela hemen eta orain bizitzea barrenak eskatzen diguna eginda.

Horregatik, oso berezia da abesbatzarentzat Barañaingo entzuleekin berriz elkartzea, aukera polita  baitugu zuenganako sentitzen duguna zuei musikaren bidez adierazteko.